AF268: 54r

rehn gönderilüb vüzerā‑yi ʿaẓām ḥażretleri ʿahd ü emān emrin ber‑ṭaraf ėtdükden ṣoñra dergāh‑i pādişāhīye getürüb ve ḫılʿatlar enʿām // u iḥsān olınub ėrtesi qalʿe teḥliye [!] olınub gitmelerine icāzet vėrildükde evvelki qadīmī yėrlü reʿāyādur gitmegi istemeyüb // ḥarbī küffārdan ayrılub yėrinde alıqonılub çıqub giden melāʿīn ser‑ḥadd ġāzīlerine ve Ḥaṭvān ḫalqına eyledükleri ihānete // bināʾen ser‑ḥadd ve Tātār ʿaskeri beklemeyüb cümlesin ṭuʿma‑i şimşīr ėdüb merd ü zenden sāḥil‑i necāta bir ferd ulaşmamışdur // benüm sulṭānum bu qalʿe şidādın ʿalī bināsından ḫaber vėrür bir es̱erdür böyle teng zemānda degüldür nice rūzgār‑i muḥāṣara ile // qullāb‑i tesḫīre gelicek degül idi hemān seʿādetlü pādişāhumuzuñ uġur‑i şerīfleri ve ibtidā fetḥ ü seferleri fażl‑i ilāhī ile olmışdur // ve aḥvāl‑i kāʾināt tebeddülāt ü teġayyürātdan ḥālī [!] olmamaġın qalʿe henūz muḥāṣarada iken Ḥasan Paşa ḥażretlerine vezāret ḥācetleri // taʿyīn olunmaq emr olınub ve Rūm ėli begler begiligi yeñiçeriler aġası Velī Aġaya ve yeñiçeriler aġalıġı dergāh‑i ʿālī qapucı başılarından // Muṣṭafā Aġa dėrler bir mechūl aġaya vėrilüb ve Nişāncı Paşa maʿzūl olub biri Lām ʿAlī Çelebiye ve reʾisü l‑küttāb Mūsā Çelebi // maʿzūl olub Oqçı‑zādeye riyāset ü defter emīni Ferrūḥ Beg maʿzūl olub emānet sābıqan reʾisü l‑küttāb Yaḥyā Çelebiye tevcīh olınub // ve ḥālā Anaṭolı begler begisi Meḥemmed Paşa ḥażretlerine Anaṭolı eyāletiyle vezāret ṣadaqa olınub Egri qalʿesinüñ muḥāfaẓasın[d]a // qalmaq fermān olunduġı evvelki vāqiʿ‑i ḥāldür ʿale l‑icmāl ḥākipāy‑i [!] şerīflerine daḫı ve qalʿenüñ fetḥine dėnilen tārīḫlerüñ birisi maʿan // tesvīd olundı inşāʾa llāhu taʿālā min baʿd daḫı ne vāqiʿ olursa daḫı (ve) inhāsında taqṣīrāt olunmaz bāqī fermān sulṭānumuñdur